A Galería Sargadelos Ferrol realizará este sábado 1 de Marzo de 11 a 13 horas da mañá unha nova sesión da campaña de animación á lectura “Educar para ler” que ven realizando nos últimos anos. Nesta ocasión, a encargada da actividade é a actriz e escritora Fusa Guillén, quen traballará cos libros Pampón tiña razón e O segredo de Daniel, ámbolos dous pertencentes ao Colectivo Garola.

o xoves 28 de febreiro terá lugar a presentación na Coruña do libro O humor non engorda…!!! (Biblos), de Kiko da Silva. Será ás 20:30 horas na Asociación Cultural Alexandre Bóveda, e coincidirá coa inauguración da exposición do mesmo nome.

«As suxestións chegadas pola xente ao enderezo electrónico do colectivo de galegas na emigración Herbas de Prata determinaron seis mulleres entre as que se atopan os dous nomes que levarán este mes de marzo -por segundo ano consecutivo- a distinción Virxinia Pereira e a distinción Rosalía durante o acto polo Día Internacional da Muller que o colectivo vai realizar na Asociación de Residentes de Vigo o 8 de marzo ás 19.30.
Para quedar coa distinción Rosalía (que simbolizan cunha roseira para a homenaxeada) que agradece a esas mulleres que levan unha vida de loita pública nalgunha causa nobre foron postuladas a sobranceira actriz Maruxa Boga, que ao longo de 45 anos conduciu a audición “Recordando a Galicia” que escoitaban milleiros de emigrados da Arxentina. Tamén quedou na lista a cantante e profesora Graciela Pereira, fundadora da asociación Os Gromos que sementa amor pola cultura galega en nenos arxentinos. E dende Galiza chegou a proposta de homenaxear a memoria de María Miramontes, dona e sostén económico e político de Ánxel Casal, que se exiliou na Arxentina, e morreu en Bos Aires no ano 1964.
O ano 2007 esa roseira quedou nas mans -por votación aberta- da nai da Praza de Maio Dionisia López Amado á que todos alcuman “la gallega de la zona norte”.
Por outra banda, Herbas de Prata entregará o recoñecemento bautizado Virxinia Pereira (representado por unha cameleira para a muller que o leve) para facer público o traballo anónimo desas galegas que co seu labor privado, contribuíron ao desenvolvemento dos seus e souberon sementar neles o amor e o respecto pola súa orixe galega. Nesta categoría, as candidatas son a señora Lola Fernández, que quedou viuva moi nova e soubo sair adiante cos seus fillos con moito compromiso coas tradicións galegas o que explica que os seus sexan os fundadores dunha das asociacións mais activas da colectividade galega en Bos Aires, a Fundación Xeito Novo.
Tamén nominada nesta categoría foi a escritora Josefa Emilia “Pepita” Sabor, que ten 91 anos e é unha referente no ámbito da Bibliotecoloxía no país. Neste momento, está sendo tratada dunhas doenzas propias da idade nun xeriátrico e ainda que ten o recoñecemento dos bibliotecarios arxentinos, non foi visibilizado o seu compromiso coa terra na que naceu. Por último, foi proposta nesta categoría a señora Isabel Varela, que ten unha historia de emigración e de loita pero tamén de traballo xeneroso en dúas institucións da colectividade: a Federación de Sociedades Galegas e na Sociedade Fillos do Axuntamento de Boiro na Arxentina. Mesmo sen ter un recoñecemento en proporción ao seu traballo, como si teñen os seus compañeiros homes, Varela é coñecida por moitísimos emigrantes aos que axuda asesorándoos sobre os seus dereitos.
O ano 2007 a cameleira que representa esta distinción foi para María Rosa Iglesias, una compostelá chegada a Bos Aires con 5 anos que é nai do historiador Ruy Farías Iglesias.
Os recoñecementos xurdirán da votación aberta e pública no blog de Herbas de Prata dende o luns 25 de febreiro e serán entregados durante o acto polo Día Internacional da Muller 2008 que se vai realizar na Asociación de Residentes de Mos o sábado día 8 de marzo ás 19.30.
Herbas de Prata instaurou o ano pasado a entrega de estes recoñecementos como xeito de botar luz sobre esas mulleres que na súa labor visible ou privada colaboraron e garantiron a pervivenza da cultura galega na Arxentina.
A asociación civil Herbas de Prata xurdiu no ano 2007 en Bos Aires coa intención de achegarse ás galegas da diáspora para pensar e traballar por e para elas. O colectivo está integrado por persoas de todas as idades e de todas as profesións que, de xeito transversal ás institucións e asociacións da colectividade galega na Arxentina e tamén fora dela, buscan abrir posibilidades de debate e proxectos colectivos enfocados nas galegas.
Xa están as seis candidatas e agardan polo voso voto. Máis información en herbasdeprata@gmail.com» (Herbas de Prata)

A presentación da novela As palabras da néboa (Premio de Novela García Barros 2007), de Francisco Castro, terá lugar en Vigo o próximo xoves 28 de febreiro na Casa do Libro, ás 8 da tarde. e que vén de editar. O acto será presentado polo director literario da Editorial Galaxia Carlos Lema e polo escritor Álvaro Otero.

Este mércores 27 de febreiro, ás 20:00 horas, terá lugar na coruñesa Galería Sargadelos a presentación da novela O de Millarengo (Edicións do Castro), de Betty Martínez Millarengo. Contará coa presenza, na sala da primeira planta do local da Rúa Real, da propia autora do libro, así como da alcaldesa de Betanzos María Faraldo e do cantautor Xoán Rubia.

A Asociación Cultural Alexandre Bóveda organiza para o mércores 27 de febreiro a presentación na Coruña do libro Sextinario: trinta e seis + tres, de Marica Campo. Terá lugar a ás 20:30 horas no salón de actos da asociación (Olmos 16-18, 1º).

Iolanda Zúñiga falará no Literactúa sobre Vidas post-it o mércores 27 de febreiro ás 20:30 horas. Será no Pub A Reserva, de Carballo.

Até o 9 de abril de 2008. Máis información na web do Concello de Outes.

Será na Fundación Caixa Galicia de Santiago, o martes 26 de febreiro ás 20:00 horas, coa participación de Rosario Sarmiento, Víctor F. Freixanes, Dolores Vilavedra e María Xosé Agra.

O martes 26 de febreiro en Portas Ártabras (A Coruña) terá lugar a presentación do libro No pazo de Laiovento. Conversas con Francisco Pillado Maior, de Xosé Luna Sanamartín. Tamén participarán no acto Henrique Rabuñal, Miguel Anxo Fernán-Vello e o propio Francisco Pillado. O libro recolle máis de trinta horas de conversa nas que Pillado fai un balance da súa traxectoria intelectual nos ámbitos da creación, a investigación, a tradución, o teatro, a edición e a vida pública galega.