No Salón de Actos da Casa da Cultura da Baña o 20 de febreiro, ás 20:30 horas, terá lugar a presentación do libro Son para a “Unión Barcalesa de La Habana” (1907- 2007) (tresCtres Editores), de X. Amancio Liñares Giraut. No acto intervirán Carlos Sixirei Paredes, Carolina García Borrazás, Paz Gago Gómez e o propio autor.

«Sotelo Blanco Edicións edita a nova obra narrativa do prolífico escritor de Melide Xosé Vázquez Pintor, “Para dicir abril”, incluída na súa colección Medusa Narrativa. Esta obra, que xa se pode atopar nas librarías, resultou gañadora do Premio Risco de Creación Literaria 2007, certame organizado anualmente pola Fundación Vicente Risco en colaboración co concello de Ourense.» (AGE)

«Gabriel Arán Ferreiro foi o gañador que obtivo unha viaxe para dúas persoas á Habana. Así o decidiu o sorteo ante notario celebrado este mércores, e retransmitido en directo pola Radio Galega. O seu microrrelato foi En poucas verbas dígolles a todos os cubanos: A NOSA CULTURA TAMÉN É VOSA!
Este texto, así como os outros 369 enviados ao concurso de microrrelatos Letras de Galicia a Cuba serán proxectados nunha pantalla situada no pavillón de Galiza na Feira. Ao tempo, calquera cubano poderá ir deixando alí mesmo as súas letras para o pobo galego, que se poderán ver na páxina web da CRTVG.» (Vieros)

[...] Abreuse así o principal evento de proxección exterior da cultura galega, ao que asistiu a delegación galega de escritores e artistas, así como unha nutrida representación do resto dos países presentes e de autoridades cubanas. [...]
O historiador e presidente do Consello da Cultura Galega, Ramón Villares, impartiu o día 14 a conferencia inaugural que deu comezo á apertura da FILH. Diante dun público moi numeroso, o historiador explicou o binomio “cultura” (un punto de vista sobre o mundo) e “país/nación” (modo de estar e actuar no mundo) aplicado ao caso galego e falou da importancia da cultura para a construción dunha identidade de país. Villares falou de Galiza como unha “nación cultura” atlántica e de finisterre, “un país en profunda transición” e que ten os seguintes rasgos básicos: peso da terra como marco social e comunitario, o mar, peso da igrexa e da relixiosidade. Tamén definiu tres vectores de influencia: Europa como porta de entrada; América como porto de saída; e Portugal e a Lusofonía como unha tradición cultural compartida.
O presidente do CCG afirmou que Galiza é un país de “construción lenta”, aludindo a unha historia cun reino con pouco goberno, á creba liberal e a unha “tardía” toma de conciencia política.

Ademais, o mesmo día a Cátedra de Cultura Galega albergou un encontro cos poetas galegos Xosé Mª Álvarez Cáccamo, Cesáreo Sánchez Igresias, Chus Pato e Xavier Rodríguez Baixeras, tras o cal actuará a cantante especialista en música medieval Paulina Ceremuzynska. [...] (Consellaría de Cultura e Deportes)

Liquids. Revista de estudos literarios ibéricos trátase dunha revista electrónica semestral que comezou a súa andaina en maio de 2007. Inclúe artigos e recensións, e ocasionalmente tamén un espazo de creación. Está aberta a todas as linguas peninsulares.
A coordinadora da sección galega convida a participar na revista con aportacións preferentes sobre a literatura galega. No seguinte número precisan de unha ou dúas recensións sobre libros de crítica ou investigación, escritos en galego ou sobre a literatura galega. (Liquids)

Xa está disponíbel o número 23 da revista foeminas. Para consultala, só é preciso entrar na web da revista.

Coincidindo co Día das Linguas, o vindeiro 21 de febreiro o Servizo de Normalización Lingüística da Universidade da Coruña organiza unha xornada de análise baixo o título “O futuro do galego nunha Europa multilingüe”.
O acto contará coa participación de intérpretes galegos que desenvolven en varias linguas o seu labor profesional en instancias da Unión Europea, os cales falarán sobre a xestión das linguas en espazos multilingües e o papel das linguas minoritarias neste contexto. Como peche tamén se proxectará o documental Linguas cruzadas. (Universidade da Coruña)

Vieiros convoca, en colaboración coa Secretaría Xeral de Política Lingüística, un concurso online de textos de temática erótica, en galego e cunha extensión máxima de 550 caracteres. Os relatos poderán enviarse dende o 11 de febreiro e até o 10 de marzo, e o gañador será decidido e
anunciado o 17 de marzo por un xurado escollido polo xornal. Os textos poden enviarse dende a propia páxina do concurso e cada autor pode presentar un máximo de tres orixinais. (Vieiros)

Dentro da programación da Concellaría de Cultura do Concello da Coruña, o mércores 13 de febreiro terá lugar unha mesa redonda sobre o himno galego a cargo de Fernando López-Acuña e Manuel Ferreiro. Será ás 20:00 horas na Casa Casares Quiroga.

Os libreiros do Grove e Sotelo Blanco Edicións organizan a presentación da novela O frío azul (Premio Lueiro Rey 2007), de Ramón Caride Ogando. Terá lugar o venres 15 de febreiro, ás 20:00 horas, no Pub Vinilo (rúa da Praza, fronte da Librería Besada) do Grove. Intervirán, para alén do autor, Ramón Domínguez Argibay, Xan Fuentes Castro, Luís Viñas e Ánxela Gracián.

A Asociación Cultural Cí­rculos Lí­ticos, por medio da súa sección “Lendo libros/Lendo libres”, convida á presentación do libro de poemas de Isidro Novo Esteiro de noites falecidas, que se celebrará o martes 12 de febreiro ás 20 horas no salón de actos da Deputación Provincial. Como vén sendo habitual nas presentacións deste grupo poético, a palabra estará acompañada de son e de imaxe. Nesta ocasión a música virá servida da man de Zbigniew Preisner e Pascal Gaigne, mentres que a imaxe en forma de cómic ad hoc será contribución de Bruno Elerre.

A Asociación de Escritores en Lingua Galega (Aelg) vai publicar na súa editora virtual o suplemento literario “Revista das Letras” do xornal Galicia Hoxe. Os números atrasados do suplemento irán aparecendo ao longo deste ano.
A Aelg, alén de animar incesantemente a escribir, asume o compromiso real de se converter a través da súa editora virtual que as novas tecnoloxías nos ofrece, na difusora da literatura dos nosos creadores/as, en especial daqueles que inician o seu mergullo na arte da palabra, como experiencia lúdica ou con vontade vocacional.
Incrementar a presenza do idioma galego na web, brindarlle aos novos da nosa literatura un medio sinxelo, doado e de grande difusión para se dar a coñecer, ofrecer ao público lector un contorno en que achar literatura de calidade no noso idioma e onde poida coñecer en primicia a obra de novos valores creativos son algúns dos obxectivos primordiais que moveu a asociación a crear a súa editora virtual. (AELG)