O escritor Paco López-Barxas e o ilustrador Kiko Dasilva, autores de Sar, Sarela e os monstros de Compostela, manterán hoxe un encontro con escolares dos colexios Raíña Fabiola e Colexiata do Sar, aos que van explicar o proceso creativo desta obra, publicada por KALANDRAKA en colaboración co Consorcio de Santiago e co Concello. Ao acto, a partir das 11:30 horas na Galería Sargadelos, asistirán tamén o alcalde, Xosé Sánchez Bugallo, e representantes do Consorcio.

O día 21 de novembro, ás 19:00 na Real Academia Galega, terá lugar o acto de presentación do poemario Nocturnidade do sal, de Alexandre Nerium (Sotelo Blanco, Col. Edoy Leliadoura). Intervirán Xosé Luís Axeitos Agrelo, Francisco Fernández Rei, Salvador García Bodaño, Xosé María Dobarro Paz, Olegario Sotelo Blanco e o autor.

O día 20 de novembro, ás 20:15 no Salón Noble do Liceo de Ourense, terá lugar o acto de presentación dos poemarios Voz alzada, de Aurora Vidal Caramés, e Deambulario, de Clementina Vidal Caramés. Intervirán Victor Campio (poeta), Fernando Pérez Poza (editor) e as autoras. (Liceo de Ourense)

O venres 21 de novembro, ás 20:00 na Libraría Couceiro de Santiago de Compostela (Praza de Cervantes), terá lugar a presentación de Palabras extremas: Escritoras gallegas e irlandesas de hoy (Netbiblo), con edición de Manuela Palacios González e Helena González Fernández. Intervirán Antonio Raúl de Toro Santos (Editor Xeral da colección Irish Studies), Arturo Casas (especialista en literatura comparada e escritor), Manuela Palacios e Mª Xesús Nogueira (Proxecto “Poesía e Xénero”).
Ao acto de presentación seguiralle un recital de poesía coa participación de María do Cebreiro, Chus Pato e Ana Romaní.

O venres 21 de novembro, ás 20:00 na sala de conferencias da Fundación Caixa Galicia (Policarpo Sanz, 15) terá lugar a presentación do libro Anti natura, de María Xosé Queizán. O acto, que contará coa participación de Carme Adán, Manuel Bragado e María Xosé Queizán, ofrecerá a intervención dos actores María Armesto e Xavier Picallo.

Alberte Momán, gañador do II Certame en 2007, viu presentado o libro galardoado. Enma Pedreira, gañadora do certame no ano corrente, recibiu o premio. Os accésits de 2007 e 2008, respectivamente, foron parar a Lino Braxe e Paco Souto, respectivamente. Máis información no blogue de Alberte Momán.

(A Nosa Terra)

O 19 de novembro ás 20:00 na Galería Sargadelos da Coruña (Rúa Real, 56) terá lugar a presentación do poemario Da carraxe e da paixón, Xosé Manuel Cairo Antelo. Intervirán Xulio Valcárcel, Fidel Vidal, Miguel Anxo Fernán Vello e o autor.

«O Facho tem a bem convida-lo ao lançamento do “Atlas Histórico da Galiza” de José Manuel Barbosa, escritor e historiador, e José Manuel Gonçalves Ribeira, desenhador gráfico. O Atlas Histórico da Galiza é umha obra com mais de oitenta ilustraçons e mapas, combina os materiais gráficos com os textos para oferecer uma visom que abrange, de jeito exaustivo, todas as épocas e momentos históricos da Galiza, desde a Pré-História até a actualidade, e proporciona uma explicaçom detalhada de cada um deles. Este Atlas à parte de ser umha obra de grande interesse, é ultimamente o segundo livro mais vendido do País, segundo a informaçom fornecida polo jornal A Nossa Terra.
Dia: 20 de Novembro de 2008
Hora: 7,30 do serám
Local: Livraria Couceiro
Praça do Livro (Enrique Dequit) n.º 12
A Corunha» (A. C. O Facho)

Comunicamos a aparición do novo libro Dios, Hombre, Mundo, de Victorino Pérez (Editorial Herder), que será presentado o próximo 10 de decembro en Barcelona, aínda que xa se pode adquirir. Lembramos que publicou este ano tamén Más allá de la fragmentación de la teología, el saber y la vida: Raimon Panikkar (Ed. Tirant lo Blanch), con prólogo do mesmo Raimon Panikkar.

O xoves 13 de novembro, ás 20:00 na Biblioteca Pública da Coruña Miguel González Garcés, terá lugar a presentación do libro O libro das viaxes imaxinarias, de Xabier Docampo e Xosé Cobas. Tamén será inaugurada unha exposición coas ilustracións de Xosé Cobas. (Biblioteca Pública Nodal Miguel González Garcés)

O número dous da revista cultural A Torre do Castro está dedicado ós 50 anos do comezo das obras de desecamento da lagoa de Antela (1958-2008). (Asociación Cultural de Amigos da Casa da Lagoa)