Coa intención de facerlle fronte á globalización e dado que semella posíbel a revitalización e repoboación do noso agro, propóñovos que entre todos/as recuperásemos o nome dos produtos que nel se daban e quizais se volvan dar. Porque as novas xeracións non saben o que é unha saborosa camoesa ou un delicioso peruco e en troques coñecen a encerada “red winter” e a insípida “golden” que lles venden no supermercado.
Trátase de, ademais de achegar nomes de castes de froitas, verduras e outros produtos do campo, facer cando se crea necesario unha pequena descrición, resaltar as súas características.
Tamén sería interesante saber particulares tratamentos ou embutidos non comúns da carne do porco ou doutros animais.
Fundamental, como no resto das palabras con memoria, é poñer o lugar de escoita.
Enviade as vosas achegas ao e-mail da sección: palabra.con.memoria@aelg.org
Podedes ver aquí a colleita de palabras con memoria a día de hoxe. Espero que esta proposta sexa do voso interese.

Isidro Novo, Vogal da Aelg en Lugo.

A Asociación Cultural Alexandre Bóveda informa que este xoves 8 de maio, ás 20:30 no salón de actos da entidade (R/ Olmos 16-18, 1º), terá lugar a segunda das conferencias adicada este ano á conmemoración do Día das Letras Galegas. Nesta ocasión estará con nós D. Xosé Ramón Freixeiro Mato, que impartirá unha conferencia intitulada Os prexuízos lingüísticos.

A Xunta Directiva da Asociación Cultural Alexandre Bóveda informa das actividades previstas para o mes de maio.
* Martes 6: Conferencia dentro do ciclo do Día das Letras Galegas, a cargo de Henrique Rabunhal, intitulada “Xosé Álvarez Blázquez na súa canle secreta”, ás 20:30 h, no salón de actos da ACAB.
* Xoves 8: Conferencia dentro do ciclo do Día das Letras Galegas, a cargo de Xosé Ramón Freixeiro, intitulada “Os prexuízos lingüísticos”, ás 20:30 h, no salón de actos da ACAB.
* Martes 20: Conferencia dentro do ciclo do Día das Letras Galegas, a cargo de Pilar García Negro, intitulada “O decálogo que a lingua galega precisa”, ás 20:30 h, no salón de actos da ACAB.
* Mércores 21: Presentación do libro Historia da Asociación Cultural Alexandre Bóveda de Dna. Begoña Álvarez Bravo, acompañada polo presidente da Asociación, D. Roberto Catoria e do Vicepresidente da Deputación, D. Pablo Villamar, ás 20:30 h, no local da asociación.
* Xoves 29: Conferencia A destrucción do patrimonio na Coruña e bisbarra, a cargo do arqueólogo e historiador Manolo Díaz, e presentación da páxina web da asociación de Denuncia da destrucción do patrimonio na Galiza.
* Sábado 31: Gala final do I certame de composición coral en galego Alexandre Bóveda, no Teatro Colón da Coruña, ás 20:30h, con entrada de balde.
Participarán o Coro Alexandre Bóveda, Coral Polifónica de Bergantiños, Coral Viladauga de Cenlle (Ourense) e o Coro Cantabile da Coruña defendendo as composicións finalistas.

Durante a semana das Letras galegas, do 12 ao 16 de maio, repartiranse de balde exemplares do libro Historia da A. C. Alexandre Bóveda, recentemente editado e que se presentara na semana seguinte.

Xa está disponíbel a información sobre o II Curso de verán de lingua e cultura galegas para estranxeiros na páxina web do Centro de Linguas da UDC.

O Centro de Linguas da Universidade da Coruña, en colaboración co Servizo de Normalización Lingüística da UDC e a Secretaría Xeral de Política Lingüística da Xunta de Galicia, organiza estes cursos de verán de Lingua e Cultura Galegas diríixidos a aquelas persoas que procedan de fóra da Comunidade Autónoma de Galicia e que estean interesadas en se introduciren no estudo da lingua galega, así como en ampliaren os seus coñecementos sobre a cultura galega.
O curso impartirase entre o 1 e o 24 de xullo de 2008. Máis información en breve na web do Centro de Linguas da UDC.

O Consello da Xuventude de Galicia (CXG), a través do seu Servizo de Normalización Lingüística, puxo en marcha a IIª edición de Lingua de Amor, o concurso de declaracións de amor a través do correo electrónico.
Lingua de Amor ten como obxectivo principal dinamizar o uso da lingua galega entre os máis novos en espazos de comunicación habituais para eles como son os correos electrónicos, chats, foros…
Para participar no concurso só hai que rexistrarse na páxina Lingua de amor e enviar unha declaración de amor en galego (máximo 350 caracteres). A data límite para o envío das declaracións é o 14 de maio de 2008.

Debido a obrigas profesionais inaprazábeis por parte da organización, participantes e asistentes, a Aelg vese na inevitábel obriga de adiar para o SÁBADO DÍA 12 DE ABRIL a Homenaxe “Os Bos e Xenerosos” que se lle ía ofrecer á Asociación Socio-Pedagóxica Galega o 29 de marzo próximo.
Por tanto, o acto de recoñecemento público desenvolverase co mesmo programa o SÁBADO 12 de ABRIL, a partir das 11:45 da mañá, no Auditorio do Centro Galego de Arte Contemporánea de Santiago de Compostela (Rúa Valle Inclán, s/n).
Desta maneira, alárgase tamén o prazo para se apuntar para o xantar de confraternidade que que compartiremos no restaurante do Hotel Porta do Camiño (Rúa Miguel Ferro Caaveiro, s/n), a partir das 14:30. Podedes confirmar a vosa asistencia ata o 8 de abril en  oficina at aelg.org ou no
teléfono 981 133 233, de 09:00 a 14:30 ou de 17:00 a 20:00. O prezo do menú, que se pagará no propio restaurante, será de 28€.

Será o venres 28 de marzo e os 4 e 11 de abrilna Facultade de Filoloxía da USC. O prazo de inscrición é até o 17 de marzo. Información completa na páxina da Coordinadora de Traballadores/as de Normalización da Lingua (CTNL).

«Dentro das actividades da AS-PG está a de dotar ao profesorado de materiais innovadores utilizando os recursos que nos proporcionan os medios audiovisuais e as novas tecnoloxías. Neste contexto situamos o vídeo É. O Verbo de M.ª dos Anxos González Refoxo e Xoán Carlos Rábade Castiñeira, que será presentado o 3 de marzo ás 19:30 no salón de actos do IES do Eusebio da Guarda (Praza de Pontevedra, A Coruña).

Destinado ao ensino secundario, materializa o esforzo de levar a imaxes unha cuestión tan complexa dentro da gramática como o verbo, explicándoa cun método totalmente innovador e supondo, por primeira vez en todas as linguas do noso contorno (só existe outro, E non chegou a ser palabra… sobre os afixos léxicos, dos mesmos autores), a edición dun material audiovisual sobre o funcionamento da lingua. A través de técnicas audiovisuais de animación, estúdase o verbo en todos os seus aspectos: concepto de verbo, elementos e valores, morfemas, irregularidades nos morfemas… A finalidade é tornar claros e amenos uns contidos gramaticais que á maioría do alumnado resultan áridos e problemáticos, utilizando a imaxe como elemento esclarecedor da base teórica.» (AS-PG)

Segue en andamento o proxecto “Palabras con memoria”, que pretende xuntar un banco de palabras en desuso (e polo tanto en perigo de extinción) co afán de recuperalas e poñelas de novo en vixencia e nos dicionarios. En breve habilitaremos un espazo na web da Aelg que facilite a recolla de palabras.
Animámosvos a seguir facendo os vosos envíos ao seguinte enderezo electrónico a cargo do noso vogal por Lugo, Isidro Novo: palabra.con.memoria@aelg.org
Ao enviar a palabra, cómpre facer constancia do seu significado ou significados, así como a zona (ou zonas) onde aínda pode ser escoitada, tamén doutras características que se consideren oportunas para a súa rehabilitación. (AELG)

Coincidindo co Día das Linguas, o vindeiro 21 de febreiro o Servizo de Normalización Lingüística da Universidade da Coruña organiza unha xornada de análise baixo o título “O futuro do galego nunha Europa multilingüe”.
O acto contará coa participación de intérpretes galegos que desenvolven en varias linguas o seu labor profesional en instancias da Unión Europea, os cales falarán sobre a xestión das linguas en espazos multilingües e o papel das linguas minoritarias neste contexto. Como peche tamén se proxectará o documental Linguas cruzadas. (Universidade da Coruña)

«A Asociación Diversidad y Convivencia pediu aos partidos políticos que concorren nas próximas eleccións andaluzas que inclúan nos seus programas a creación de cátedras de catalán, galego e eusquera nas universidades da rexión e nas escolas oficiais de idiomas.

O presidente desta asociación en Andalucía, José Antonio Sierra, explicou a Efe que a iniciativa xurdiu tras comprobar que, mentres o catalán, o galego e o euskera poden aprenderse en cidades como Berlín, Bucareste e París, a aprendizaxe dalgunha destas linguas non é ofertada en ningunha universidade andaluza ou nas escolas oficiais de idiomas.

A realidade é, segundo Sierra, que moitos andaluces teñen que trasladarse a outras comunidades para traballar e precisan aprender as linguas cooficiais que alí se falan, polo que considerou necesario impulsar esta iniciativa que ten como pretensión facilitar a aprendizaxe de todas as linguas oficiais do Estado.

Deste modo facilitaríase a movilidade laboral e estudiantil, fomentaríase a integración de moitos andaluces que marchan para residir en comunidades bilingües e impulsaríase a convivencia entre todos os españois.

Dáse o “paradoxo” de que, por exemplo, o catalán pode ser estudado en cidades como Moscú, Múnich ou Sofía, mentres que en Andalucía no hai ningún centro oficial que oferte o seu estudo.» (EFE)