«O Centro de Creación Dramática Contemporánea do Centro Dramático Galego (CDG) retoma a partir de hoxe a súa actividade en Compostela co inicio do terceiro obradoiro do curso de escritura teatral Pistas para unha dramaturxia da actualidade II, impartido polo dramaturgo portugués Jacinto Lucas Pires e supervisado por Cándido Pazó, e da segunda parte do laboratorio de investigación e innovación escénica a cargo de Rosa Sánchez e Alain Baumann, de Kònic Thtr. [...] (Consellaría de Cultura e Deportes)

O martes 4 de marzo (18:00 horas) na Biblioteca Municipal Infantil e Xuvenil da Coruña (Rúa Durán Loriga 10, B) Fernando Moreiras falará sobre o oficio de tradutor cos participantes no Obradoiro de escritura para adolescentes desta biblioteca. A súa última obra traducida para o galego foi A aurora boreal de Philip Pullman, novela recentemente levada a cinema.
A experiencia comezou o pasado mes de novembro e nel participan trece rapaces e rapazas de 12 a 18 anos, que xa pouideron coñecer ao vivo a autores como Miguelanxo Prado e Lino Braxe. As aulas maxistrais programadas para abril, maio e xuño serán impartidas por Xesús Fraga, escritor e xornalista, un autor dramático e un guionista de cinema aínda por confirmar. Con estas aulas a organización pretende mostrar todas las posibilidades que ofrece a escritura e romper os tópicos que rodean a profesión de escritor.

Desde a Asociación de Escritores en Lingua Galega lanzamos unha nova convocatoria dos obradoiros de creación literaria en lingua galega destinados ao ensino obrigatorio e post-obrigatorio non universitario, impartidos por escritores/as socias desta entidade nos centros de ensino nos meses de marzo, abril e maio. (AELG)

A Galería Sargadelos Ferrol realizará este sábado 1 de Marzo de 11 a 13 horas da mañá unha nova sesión da campaña de animación á lectura “Educar para ler” que ven realizando nos últimos anos. Nesta ocasión, a encargada da actividade é a actriz e escritora Fusa Guillén, quen traballará cos libros Pampón tiña razón e O segredo de Daniel, ámbolos dous pertencentes ao Colectivo Garola.

Ao seu regreso de Londres, onde estivo realizando un entrenamiento sobre narración oral, a actriz María Inés Cuadrado ofrecerá un obradoiro sobre a arte de contar dirixido a todas aquelas persoas que queiran obter recursos para gozar desta máxica actividade.
Esta proposta consta de 15 horas de traballo intensivo sobre os estímulos para crear historias, o “aterezo” material e emocional do/a narrador/a, exercicios prácticos individuais e grupais para lle dar vida ao relato, recursos para a participación dos oíntes, tendo en conta a potencia da voz, a expresividade do corpo e a utilización do espazo.
Terá lugar en febreiro do sábado 23 (16 a 21) ao domingo 24 (de 9 a 14 e de 16 a 21) no Teatro del Andamio. Ás 19 horas do domingo a clase abrirase ao público para poder amosar e compartir os traballos realizados. O custe do obradoiro é de 80€. Informes e inscrición exclusivamente no 699 28 88 61. (Teatro del Andamio)

O 19 de xaneiro a partir das 11:00 horas terá lugar na Galería Sargadelos de Ferrol (R/ Rubalcava, 30-32) un obradoiro de ilustración arredor da obra Punver, de Yolanda Castaño.

Ramón Nicolás Rodríguez comandará un obradoiro de lectura no Centro Social de Caixanova en Vigo. Será os días 15, 22 e 29 de xaneiro, e 12 e 19 de febreiro, en horario de 18:30 a 20:30 horas.

Dentro da campaña Educar para ler, terá lugar o obradoiro de ilustración e humor arredor do libro de Edicións Xerais Minimaladas, de Carlos López e David Pintor. Será na Galería Sargadelos de Ferrol o sábado 15 ás 11:00 horas.

«A Asociación de Escritores en Lingua Galega, en colaboración co Servizo Galego de Igualdade da Vicepresidencia da Igualdade e do Benestar, continúa mañá en Sanxenxo (Portonovo) e pasado mañá en Cuntis a nova quenda de cinco obradoiros de creación literaria que levaron e levarán durante o outono outras tantas escritoras a Padrón, Ribeira, Santa Comba, Sanxenxo e Cuntis e enfocados principalmente a colectivos de mulleres.
Esta serie de obradoiros dan continuidade a un proxecto que no que xa participaron as escritoras Marta Dacosta, Laura Caveiro, Estíbaliz Espinosa, María Xosé Queizán, María Reimóndez, María do Cebreiro e Concha Blanco.
Elvira Riveiro Tobío: Mañá, 23 de novembro, ás 19:00, no Edificio ultiusos de Portonovo do Concello de Sanxenxo.
Marta Dacosta: Sábado 24 de novembro, ás 20:00, na Sala de esparcemento a Oficina de información xuvenil, no Centro sociocultural José Raido Patelas do Concello de Cuntis.» (AELG)

O 16 de novembro, ás 20:00 horas no Edificio Multiusos do Concello de Santa Comba terá lugar un obradoiro literario con responsabilidade de Concha Blanco.

A Asociación de Escritores en Lingua Galega en colaboración co Servizo Galego de Igualdade da Vicepresidencia da Igualdade e do Benestar, continúa mañá en Santa Comba a nova quenda de cinco obradoiros de creación literaria que se levan a cabo durante o outono outras tantas escritoras a Padrón, Ribeira, Sanxenxo e Cuntis e enfocados principalmente a colectivos de mulleres.

A cidadanía de Santa Comba e a súa comarca poderá asistir libremente mañá, 16 de novembro, ás 20:00, no Edificio Multiusos do Concello de Santa Comba ao obradoiro literario que impartirá a autora Concha Blanco.
Esta serie de obradoiros dan continuidade a un proxecto que no que xa participaron as escritoras Marta Dacosta, Laura Caveiro, Estíbaliz Espinosa, María Xosé Queizán, María Reimóndez e María do Cebreiro. (AELG)