Radio-T V
12 Marzo 2007
RADIO GALEGA
«Rivadulla Corcón dirixe e presenta este programa que pretende fomentar a lectura. O obxectivo principal de A casa do vagabundo é que os escritores e escritoras do país teñan un lugar de seu na radio pública. En cada programa presentarase un libro e conversarase co autor ou autora sobre a súa obra dun xeito distendido.»
«É un dos programas diarios de información cultural máis veteranos de radiodifusión galega. Comezou na temporada 1990-1991 cun formato que conxuga características dos informativos e mais da revista. O programa concíbese como un espazo de información, plataforma de divulgación cultural e foro de reflexión e debate atento ás novas fórmulas artísticas e creativas.
Desde o rigor dun programa especializado, Diario Cultural acolleu ao longo destes doce anos en antena os creadores e creadoras máis destacados dos distintos ámbitos artísticos, asistiu ao desenvolvemento de sectores especialmente dinámicos e contribuíu a un maior coñecemento das raíces da cultura e da historia propias de Galicia.
O día a día da cultura conforma o eixe do programa que comparte a atención da actualidade coa elaboración de monográficos sobre autores como Álvaro Cunqueiro, Ramón Otero Pedrayo, Castelao, etc. ou acontecementos de especial relevancia.
Entrevistas, crítica especializada, debates, conversas, reportaxes, espazos dedicados á creación, lecturas dramatizadas e poéticas xunto con especiais e retransmisións conforman este espazo que se emite cada día na Radio Galega.»
TELEVISIÓN DE GALICIA
«Programa que nace para contribuír ao fomento da lectura e apoiar o traballo dos escritores e mais das editoriais galegas. Manolo Romón presenta este espazo.»
«Xandra Tedín e Miguel Fernández presentan este programa que dirixe Francisco Novo. Miraxes é un espazo para a cultura, un ben específico rico e variado que posúe a comunidade. Presenta as novidades de todos os eidos artísticos e culturais do noso país. Este espazo falará dos novos creadores, das iniciativas culturais e das tendencias artísticas. Contará cunha entrevista no estudio e outras seccións de reportaxes, axendas de actualidade, cine e música.
Miraxes ofrece unha ampla visión da nosa cultura e das correntes máis anovadoras, con entrevistas aos seus protagonistas e mostras dos seus traballos. Trátanse temas como as novas tecnoloxías, o feminismo, a xeración da República, o medio natural, a cultura gai, a lusofonía ou a nova música galega. O obxectivo do espazo é abrirlles as portas da televisión pública de Galicia a todas as ideas e creacións.
O espazo celebrou o seu aniversario o 28 de xaneiro, tras a emisión de 100 programas ao longo dun ano, cunha renovación de imaxe e de música, composta por Xabier Olite. Outras das novidades que presenta é a introdución de seccións, formatos e contidos novos. Falarase de arquitectura, tendencias e videocreación. Neste apartado, artistas, músicos e poetas disporán de dous minutos para propoñer mundos novos e vidas privadas a través dunha cámara doméstica que lles facilita o programa. Miraxes mantén o espazo de crítica cos colaboradores Antón Lopo, na crítica de espectáculos e Susana Cendán no comentario de artes plásticas.
O programa emítese os sábados e domingos ás 15:30, coa axenda de exposicións, actuacións, concertos e convocatorias semanais. O luns á noite bótaselles unha ollada ás novas creacións, aos experimentos e ás entrevistas. Na fin de semana e o luns á noite, Miraxes segue a falar de cultura na televisión pública de Galicia.»
